صوّتوا لهالعجيبة

1 Star2 Stars3 Stars4 Stars5 Stars (23 votes, average: 5.00 out of 5)
Loading ... Loading ...

1,723 views

صوّتوا لهالعجيبة

من فترة كنتِ المصدر الاساسي لكتاباتي، وكانت كل القصة عم تدور حولك. منك  كنتْ طلّع كل الكلمات، خاصة وقت كون نايمة معك (هالمعلومة أول مرة بتعرفيها…). من وقت عرفتك، وانت ساكنة كل شي فيي، حتى وقت تكوني كتير معصبة وكون أنا عم قول بقلبي ” الله يستر…”. بس صراحة بهالوقت بكون بقمة الفرح، إنت معصبة وأنا كتير رايقة. وأكيد هلق إنت وعم تقري عم تتذكري كتير اشياء…

من فترة إنت غيرتي حياتي، صرتي رقم واحد بحياتي، بعد ما رحت وجيت وما تركت حدا من شرِي! اخدتيني وعلقتيني فيكي، وهلق صار صعبة كتير إنو فل. وبس انا قول صعبة بكون عارفة شو عم بحكي، ويمكن إنت عارفة أكتر مني أنا شو عم بحكي.

من فترة إنت صرتي حكايتي، إنت البطلة المتمردة على كل شي بحبكة هالقصة، البطلة الغنوجة يلي ما بتحب حدا يشاركها شي، البطلة المستبدة يلي بدها تاخذ كل شي!!! وإنت عن جد أخذتي كل شي.

من فترة صرتي إبتسامتي، بأصعب اوقاتي كنت تخليني إضحك، وهيدا الشي (أكيد هلق انت عم تضحكي على كلمة شي) ما حدا سبقك عليه غير صديقي يللي بطّل صديقي. خليتني إبتسم حتى وانت بعيدة عني، بس هيك لمجرد يمرق طيفك من حدي بتكون ابتسامتي لورا دينتي، ببتسم وقت إسمعك أو إتذكر كيف بتتمسخري عليي أنا و عم بحكي شي كلمة صغيرة بغير لهجتك، ببتسم وقت صير أنا عيد الكلمات بيني وبين حالي وما يزبطوا معي، ببتسم وقت اتذكرك كيف كنتِ تزعلي لأن أنا باكُل وانت بتنصحي، وانت بتعملي رياضة وانا بضعف، ببتسم وقت إتذكر كيف وقت بدك شي بتبلشي تتغنجي مثل طفل صغير وتزمي شفافك على بعض وتطلعي فيي وأنا قول من الأخر شو في؟ شو بدك؟ وهون بسمع ضحكتك يللي اشتقتلها هلق، وبتضحك كتير وقت نكون سوا عم نفرشي اسناننا بنفس الفرشاية وبراسنا إنو لازم حدا يسبق ويركض على التخت، وكتير كتير اشيا غيرها…

من فترة صرتي دمعاتي، هلق انا صحيح دمعتي بتنزل بسرعة، بس معك صارت (أوفر) تنزل، على قد ما بحبك على قد ما كانت تنزل، يعني مرات كنت ابكي بس لأنك بعيدة عني شوي وما فيي شوفك أو ضمك أو بوسك، ومرات كتيرة ابكي انا وجنبك بس لمجرد كون عم فكر انو يمكن ابعد عنك (وهيدي من سابع المستحيلات)، حتى إنو كانت دمعتي تنزل وقت شوفك انت عم تبكي. بتتذكري وقت كنا قاعدين سوا عم نبكي نهار الجمعة ونهار السبت؟؟؟ يمكن هيدي كانت اكتر مرة ببكي فيها من بعد ما فل حدا بحبو كتير وهوي بحبك كتير، ويمكن لو كان بعدو كان قاعد عم يبكي معنا، وعلى فكرة انا هلق عم ببكي…

من فترة صرتي عجيبتي!!! ايه انت عجيبتي، انت عجيبة كيف خليتيني حبك، انت عجيبة كيف عم حبك اكتر بعد كل مشكل ومشكل، انت عجيبة كيف بتخليني فكر ارتكب جريمة اذا حدا لمسك (مرات بحس انو ما عم بمزح بهالكلمة)، انت عجيبة قديش انت حلوة ورقيقة وناعمة وجذابة وكل شي، وبنفس الوقت يا ويلو يلي بيغلط غلطة صغيرة معك!!! بس بصراحة إنت حدا كتير مهضوم إنت ومعصبة، ولأن كل شي فيكي عجيبة، صار لازم نصوتلك لأن هلق موسم التصويت للعجايب، وأنا متأكدة إنو عجيبتي ما في منها بالكون كله…

 ما رح اكتب كل شي بعرفو عنك بهالنص، لأن من فترة كتير كتير كتير قصيرة حكيتيني عالتلفون أنا وعم بكتب  هالنص، فمن هون رح قلك بحبك وبعشقك… وما رح إتخلى عنك.

 contributed by Green (غرين )

Related Posts with Thumbnails

10 Responses to “صوّتوا لهالعجيبة”

  1. فرح

    Nov 05. 2011

    رح صوتلكن تضلوا سوا كل العمر
    وأنا كمان هلق عمببكي لأنو اتذكرت لما حبيبتي كانت تقلي ليش في حزن كثير بعيونك
    مع إني كنت وأنا حدا أسعد إنسانة بالدنيا
    بس ماحسيت بهالحزن وعشتو غير لما تركتني وراحت

    Reply to this comment
  2. mimi

    Nov 01. 2011

    well …… a little tear on a sensetive cheek falling down till it hangs on my lips u know it taste so salty but give it a chance mybe u will know then what is TAsTE of LIfE

    Reply to this comment
  3. green

    Nov 01. 2011

    red the original one <3

    Reply to this comment
  4. green

    Nov 01. 2011

    red the original one <3 thx

    Reply to this comment
  5. Red (the original one)

    Nov 01. 2011

    I lurrrrv it
    so cute
    so cute
    so cute
    <3

    Reply to this comment
  6. Ziad

    Oct 31. 2011

    Article bet3a2ed w btlmos aleb kel wa7ad byo2raha l2ano bidun shak neb3a mn samim alb ly kataba…Ktir asaret fiyeh 5susan eno maktubeh bi tari2a basita sahleh b3ideh 3n kel l3ibarat ltaneneh lraneneh ly bi7awel mn 5ilela lwa7ad eno ysta3red kudurato l adabiyeh…Niyel lsha5s lma2sud bi hl article l2ano akid huweh ma7zuz eno fi 7ada bi7ebo hl ad w haydeh ne3meh…Allah ydim lma7abeh w ma ye7rom tnen bi7ebo b3d mn b3d

    Reply to this comment
  7. red

    Oct 31. 2011

    c impressionnaaaaaaaaaaaantt !! sa ma toucher !!

    Reply to this comment
  8. Maverick

    Oct 31. 2011

    sweeeeeeeeeeeeeeeeeeeeeeeet :D

    Reply to this comment
  9. louca

    Oct 31. 2011

    amazing one… w niyela :)

    Reply to this comment
  10. wetwhuts

    Oct 31. 2011

    كتيييييييير حبّيت

    Reply to this comment

Leave a Reply