اشتقتلّك

1 Star2 Stars3 Stars4 Stars5 Stars (26 votes, average: 5.00 out of 5)
Loading ... Loading ...

6,058 views

ما بعرف اذا انتي اشتقتيلي كمان، أو لأ. أو اشتقتيلي وما بتقولي، لأنك “بطبعك ما بتعبري”. بس بهاللحظة، غرفتي ما عادت تساع شوق، اشتقتلك واشتقتلك واشتقتلك واشتقتلك لدرجة انو فاض الشوق لبرّا. وبعدني عم بشتقلك.

ما بعرف اذا لمن تطلعي فيني هيك، بتكوني عم تفكري باللي عم فكر فيه، أو بس عم تطلعي.
ما بعرف لمن ما تطلعي فيني أبدا، اذا بتكوني عم تهربي من يللي عم بهرب منو، أو بس ما ع بالك تطلعي.
ما بعرف لمن تبتسمي، اذا بتكوني عارفة انو بهاللحظة عم قول لحالي: معقول في شي أحلى من هالبسمة؟
ما بعرف لمن نكون هلقد قراب من بعض، اذا بتكوني عارفة شو عم بيصير فيني أو لأ. اذا بتكوني قدرانة تتنفسي، أو متلي، كل شي فيكي مخدر وعم ترجفي.
ما بعرف اذا بخطر ع بالك، قد ما بتخطري ع بالي، هيديك اليوم عديتهن: النهار فيه 86400 لحظة. انتي بتخطري ع بالي 86400 لحظة منهن. واذا مش كلهن، لأن ممكن كون نايمة كم ساعة منهن، بكون عم حسّك بعيوني وجواتي بالحلم.
ما بعرف كم مرة بين هال 86400 لحظة، مسكت التلفون تا ابعتلك شي، أي شي، “كيفك”، “اشتقتلك”، “تذكرتك”، أي شي، وارجع امحي يللي كتبتو.
ما بعرف لمن تقولي لي شي قاسي، اذا بتكوني عم تقسي ع حالك فيه، وعم تهربي من يللي بتحسيه، أو ببساطة، عم تقصدي تكوني قاسية، لأنو كمان “القسوة بطبعك”.
ما بعرف لمن كون قريبة منك هلقد وشمك، وصير عم بتنفس رقبتك وخدك وشعرك، اذا بتكوني كمان عم تتنفسيني، أو ببساطة، عم تتنفسي أوكسجين.
ما بعرف لمن حط راسي عالمخدة ويمرق كل شي حكيناه بالنهار قدامي، قد ما كان سخيف، اذا انت بتعملي هيك، أو ببساطة، بتفرشي سنانك وبتنامي.
ما بعرف لمن نكون كتار، وتكوني انتي، ليش ببطل في حدن غيرك، وقلبي بيصير يهرب من بين ضلوعي تا ينط لعندك، وانا شد فيه واحبسو وأربطو، بس مش دايما بتزبط معي.
ما بعرف انت شو بالنسبة الي، ولا بعرف انا شو بالنسبة الك، ولا بعرف نحنا شو سوا، ولا بعرف اذا مبين عليي اني مش عارفة شي.
ما بعرف قديش هالشي صح، وقديش هالشي غلط، بس بعرف انو مش قدرانة حس إلا هيك.
ما بعرف كم مرة ضبيت غراضي وقلت اني فالة من كل شي خصو فيكي، بس دايما كنت ضلني محلي. أبعد مشوار رحتو كان عالبلكون، تفرجت ع بنت تانية، اكتشفت قديش انتي أحلى، ورجعت لعندك.
ما بعرف شو اسمو هيدا، حب، اعجاب، صداقة، هبل، جنون. ما بعرف، ما بيهمني أعرف “علم النفس” شو بيسميه. بس بعرف انو موجود فيني، وما بعرف اذا موجود فيكي.
ما بعرف ليش فيني احكيكي بأي شي، بالمفرد وبالجمع، إلا بهالشي يللي كلو عنك.
ما بعرف اذا عندي قدرة مرة تانية، طلع بعيونك وقلك يللي قلتو أول مرة.
ما بعرف قديش فيني ضل عم بضحكلك، وانت مش الي، وانت مش معي.
ما بعرف ليش في كتير أحلى منك، وكتير أذكى منك، وكتير أهضم منك، وكتير أقرب منك، بس انا ما بشوف غيرك.
ما بعرف اذا فيني اعترفلك، انو هيدا يللي كتبتو، كتبتو عنك.
ما بعرف ليش بعرف انو ولا مرة رح تكوني الي ورح كون الك.
ما بعرف لمن تقريه وتسأليني، شو رح قلك، وأي كذبة رح ألفلك.
بس بعرف اني كتير، كتير اشتقتلك.

samira
Aphrodite likes to drive fast. Real fast. Whether behind the wheel, behind her computer, or behind a plate of a double cheeseburger, fries, and a side order of pasta salad, Aphrodite is moving 100km a minute. A journalist by training and a poet by passion, Aphrodite does not believe in suntan lotion, aspirin, or dishonesty. But she does believe in Bekhsoos. Very much.

Leave a Reply